1Cor 1 | ASO | STEP | Izesu' Kilisito' aposolo lolo' iline lo O'moso'mo gala gilido' nele'mize molave Paulo' naza nene leze zuho Sositeni' nesi maka' mino

1 Corinthians 1

Paulo' Aza Izesu' Zuho Kolidi Ebeku' Minani' Nene Geke' Lo-ngedo Engikumu' O'mosola Isaa' Neve Lo Opo'ni Laa' Ingumu' Lo-ngimine'

1 Izesu' Kilisito' aposolo lolo' iline lo O'moso'mo gala gilido' nele'mize molave Paulo' naza nene leze zuho Sositeni' nesi maka' mino 2 Kolidi ebeta O'moso'mi evenele lengita luhuvo inite' mene nogize lingimuve. Lingine Izesu' Kilisitoda igi gi'mizikevo O'moso'mo ei' evenele zuho minilizave lo do kegese-lingidine'. Ido' do kegese-lingidine' nene ebe' mukita engi' Guve'inesi vesi leli' Guvetesi vesi minive Izesu' Kilisito'ni opo'ni laa' nave muki' nesi nene laminekovo' lisihe' igi minilizave lo ei' evenele do kegeso lengele'mize molani' ve. 3 Ee, naza nene luhuvo inite' mene lengita nogize lengemo O'moso metehidasi Guvetesi ve Izesu' Kilisito' eitasi nene lengi' nasahili' i-lingidikesivo lengi' muludingu' nene hongu minelive lo engita noluve.

Engita Monoli'mi Amuzo Soto' Ilingumu' Paulo' Aza O'moso Opo'ni Line'

4 Naza Kilisito' gamazi've lamine' nene lo-lengemekuvo a'mine gamazi nene gilikevo lengita lutingu' amuzo molosa minine' ma neive. Ne'mo nene lingine mo Izesu' Kilisitoda igi gi'mizikevo O'moso'mo nasahili' o-lengedo lutingu' nene monovo danava laminekovo' go'zo vai' lo-lengedave. Ne'mo gele guno oga' nene lengita mo vai' lavo gamazi li soto' iga' nani' nene laminekutikovo' laa' nave. Ee, ne'mino O'moso'mo lengi' nasahili' o-lingidine' nemu' nene naza O'mosola isaa' neve lo gamene gamene opo'ni laa' nouve. 7 Ido' O'moso'mo ne'mino nasahili' o-lingidine' nenako nemu' nene Guvetesi ve Izesu' Kilisito' ogo soto' neivo ningelone' gamenemu' gizebo igi minangumu' nene monovo danava lamine' ato ato' O'moso'mo eze evenele lehize-ledaa' neinguti' nene lingine monovo danava hamokisi ma vise' isa'mave. 8 O'moso aza hize ele' o-lengede'mo vo neivo gamene naba aliteleseive. Ne'mine ogavo Guvetesi ve Izesu' Kilisito' aline' gameneu' nene okodido' gamazi nomivo laminekovo' ha minilisave. 9 O'moso'mi gipele leli' Guvetesi ve Izesu' Kilisito' eikisi lutine hamo' ogavo minilizave lo lengele'mize molave ei' nene gote izesa'mine' ve. Ido' eze gamazi line' nene vo haza amiline' nenako nemu' a'mine luvoni' gamazi nene asi've O'moso ne'mo do soto' ogo do gihile izeleseive.

Kolidi Aleve Ingine Monokumu' Ve Li Ho'li Vi Eza Ema Vangumu' Paulo' Line'

10 Agae, neze zuhokizo, Guvetesi ve Izesu' Kilisito' ei' velemu' ogo gatine doo gamazi ti' lo nolo-lingimuze. Gililo. Lingine gamazi ato ato' li vi eza ema vamilo. Mukito' lingine gohi di bizii igi lutine di hamo' igi hamo' lutidokovo' minilo. 11 Neze zuhokizo, naza mene gamazi noluvoni' nene Kolove' zuho linge malite lingine nene lutine aka ato atoto' vavosa nene lolize hizi izi huki vi eza ema vaa' nave li-nimikevosa nene noluve. 12 Ne'minemu' nene noluve: Lingine vi eza ema vi hamo hamo' ne'mine laa' nave: Laza Paulo'ni e'metaa' noune. Ido' ma nete Apolo'ni e'metaa' noune. Ido' ma nete nene Petolo'ni e'metaa' noune laa' nave. Ido' ma nete nene Kilisito'ni e'metaa' none laa' nave. 13 Ne'mine nene nanitekumu' nilave. Kilisito' nene ho'lo ato ato' vai' minamive. Paulo' naza nene lengi' do lungu' izelesa lohoto' zalo' ma helamuve. Lingine noso hili-lingidani' nene neni' Paulo' muliseu' nene ma imi hilamave. 14 Ido' evene' ma neniku' imi hilikevo naza nene neni' Paulo' gulivelokovo' noso holo-ledave li gilikelizave lo lingine noso hili-lingidanguti' ve sitakovo' Kilisipo'ni ve Gaio'ni ve engi' nevo' nene neni' noso holo-ngedo gohi ma holo-lengedamuvoni' ma nene lamine' ve lo nogiluve. 16 Ido' ma nene Setehano' ve eze zuhosi noso holo-ngiduvoni' nenako neloti' nene noso ma holo-ngiduhe holo-ngedamuhe gelamuve. 17 Kilisito' aza nene evene' mono' noso holo-ngedeline lo nimiselamive. Ei' gamazi've lamine' nene lo-ngeme ngeme' iline lo lo-nide neine' ma neive. Nemu' nene naza lengikuti' muki' noso holo-lengedamuvoni' nene lamine' ve lo nogiluve. Ido' naza gamazi lo soto' soto' ogo gamazi loloni' nene Kilisito' lohoto' zalo' hiline' gamazi'mi amuzo nene molo hitalonako evene' gamazi monovo gili mini' mini' igi gepe' gamazivo' laa' navete laa' nani' ne'mino lamo haza gili ngolosi gililizadokovo' lolosuve.

O'moso'mi Amuzo'vesi Ido' Gala Lamine' Gelaa' Neine' Nesi Kilisitoda Mo Neive Lo Paulo' Lo-ngimine'

18 Kilisito' do lu' izelesa hiline' ne'mi gamazi mamu' aka golosou' nivani' evene' nete nene negi gamazi lani' ne neive laa' nave. Ne'mine laa' nani'za O'moso'mo do lu' izo do eita eita o'mo novine' aleve leli' nete nene a'mine gamaziu' O'moso'mi amuzo've soto' ogo neine' nene ningo gele none. 19 Ee, ido' O'moso'mo a'minemu' line' gamazi mono' godolou' ma ti' li gizi nizani' ma neive:

Naza nene gamazi monovo gilaa' navete gamazi gilaa' nani' nene
do goloso o-ngedelesuve.
Ido' lu'ine ga'ningu' gamazi lamine' minine' nene lokuvo vo haza oloseive.
20 Ti' lo line' nemu' gamazi monovo gilaa' avemukisi ido' inite' mukikumu' sukulu li osu' lavemukisi ido' gamazi li volelo' melo' igi inite' monovo vise' iga' ave idise gameneu' nizave nemukisi nadive lo gelelone. Me misubou' minunive nene a'ne'mine vete lani' gamazimu' gamazi gihile ve lo gilune' gamazi nene O'moso'mo lavo haza gopo negi gamazi lolo' oganako nemu' nene a'ne'mine ve ingine nene mo haza ve lolo' ikeve lo gelelesune. 21 Ee, misubou' ve nete O'moso'mi monovomu' gele veveselone li vise' ani'za aza O'moso'mo gala lamine' gilido' do molo lavo engi' gili vevesaa'ine nene eze monovo ningilizado' lisihe' amivo eze monovo nene mo ningamani' ve. Ido' ne'mine igi engi' gamazi laminekuti' nene eze monovo ningamanako nemu' O'moso'mo ei' lulolo' do molo a'mine negi gamazi ve laa' nani' gamazi nene nolo-ngimunivo ve ma ingine a'mine gamazi gili ele'vole' ave nene O'moso'mo do ngu' izaa' neive. 22 Gili ele'vole' ave nene ha do ngu' izaa' neiha ingine Zuda ve nete nene ti' li laa' ani' ve: O'mosolati' gamazi nene mo eitati' neive lo gele ele'vole' olone' nene atoli'mine suno ma soto' ogavo ningosavo' nene gele ele'vole' olosune. Ne'mine lisa haza minaa' nave. Ido' heta ato' ve nGiliki aleve ingine nene inite' ato atoliti gamazi gihile'vemu' nene vise' i'mi vi minaa' nani'za 23 laza nene Kilisito' do lu' izelesa lohoto' zalo' hiline' ne'mi monovo'vevo' nene lo soto' ogo lo-ngeme ngeme' oga' noune. Ne'mino nonivo Zuda ve nete lohoto' za nene inite' goloso mamu' nilave li olovo' goloso iga' nave. Ido' heta ato' ve nete a'mine gamazi nene gamazi gihile nevoba negi gamazi ve lii gili ele'vole' isa'mave. 24 Ingine nene ne'mine iga' nani'za laza Zuda vesi nGiliki vesi O'moso'mo elese molo limido' e'metunive nene O'moso'mo gala lamine' gelaa' neine' nesi amuzo've nesi nene Kilisitoda neine' nene mo gele none. 25 Ee, O'moso'mo oga' neine' inite' nene negi inite' oga' neive laa' nani' ne'mo nene evenelite ga'ine lamine' gili iga' nani' inite' nene ivile' ogosa inite' gihile neive. Ido' O'moso'mo oga' neine' inite' nene amuzo'vesi nomine' inite' oga' neive laa' nani' ne'mo nene evenelite amuzo mili iga' nani' inite' muki' nene ngivile' ogo amuzo'vesi inite' neive. Neine' nenako nemu' nene O'moso'mo gala lamine' gelaa' neine' nesi ido' amuzo'vesi nene Kilisitoda mo neine' nene gele none. Ido' me misubou' alevelite gamazi lamine' ve li gilaa' nani' gamazi nemu' nene O'moso'mo gilivo haza nite' lolo' oga' neine' nesi nene mo gele none.

26 Neze zuhokizo, lingine nene O'moso'mo ei' ve lo elese molo lingimive ma nene nizave. Ido' nani'mine aleve nizahe nemu' gililizani' nene gamazi neuko luvoni' mauti' nene gamazi gihile neive li gili ngolo' li gililisave. Ido' lengi' monovotine nene ne'mino neingumu' noluve: Me misubouko evene' muki' nete lengikumu' nene gilavo lengiku' nene gatingu' gamazi lamine' minive nene muki' ma minamave li gilaa' nani'za lengi' a'ne'mine ve nene O'moso'mo ei' ve lo elese molo-lengedo lengele'mize molani' ve. Ido' evene' amuzo malehe nene lengiku' muki' nizamavo ido' evene' ma ize'ninge me'ninge evene' naba nizavo soto' adi'mo guve'inesi ve gili nizani' aleve nene lengiku' muki' ma nizamani'za lengi' ne'mine aleve nene O'moso'mo ei' ve lo elese molo-lengedo lengele'mize molani' ve. 27 Ne'mino lele'mize molani' nene evene' naba nevo'minevo' lele'mize molani' nevoba O'moso'mo me misubou' aleve malite evene' mamu' negi nizave li li-ngidaa' nave ma ngele'mize molokuvo ingine evene' ga'ine gili lamine' iga' ave di limi-ngidikevo ngovozo hili minilizave lo a'ne'mine ve do kegeso ngele'mize molani' ve. Ido' me misubou' alevelite evene' mamu' gilizevo nizave li li-ngidaa' nave ma ngele'mize molokuvo ingine evene' amuzo malehe nizave di limi-ngidikevo ngovozo hili minilizave lo O'moso'mo a'ne'mine ve do kegeso ngele'mize molani' ve. 28 Ee, misubou' aleveti ve'nido' nene haza ve limi minii haza nite' gehepeve gili minave nene O'moso'mo do kegeso ngele'mize molavo a'ne'mine ve nete evene' none laa' ave nene ngivile' igi minikevo haza nite' lolo' ilisave. 29 Ido' O'moso'mo ne'mine oga' neine' nene evene' malite ei' velelo' oti mini engi' oko'ine di hozi likelizave losa engi' aka'ine nene hize tile-ngedosa ne'mine oga' neive. 30 Ne'mine oga' neine'za lengi' nene O'moso ne'mo Izesu' Kilisitoda do imine' molo-lengedave. Ne'mine ogo a'mine Kilisito'ni nene gateu' gamazi lamine' minine' ne'mi izelehine lolo' o-dave. Ido' lolo' o-davo asi've ne'mo nene lelito' medelo minevo' alevo've hulo helo O'moso'mi velelo' evene' lisihe' laminekovo' minilizave lo goloso inite' apase-ledoo O'moso'mi evenele lolo' o-ledo aza golosouti' mudise lele'mize lamine' oloseive. 31 Ido' O'moso'mo ne'mine neine' nene mono' godolou' gamazi ma ti' li gizani' malo' nene evene' muki' e'metilizave losa ne'mine ine' ve: Ve ma aza ei' oko'nomu' olize noizeline' nevo alamo Guvelesi vemukovo' olize izelive.